ضاقت ولكن مابقى بالضيق شـيء مستجيـر
كثر المصايب ياعرب ماهي مصايـب واهيَـه

راحت على غيري ونا دايم على مبـدا أسيـر
لو انها كانت ذهب يمـدي المصالـح راهيَـه

شديت فكري ياعرب ونا هنا السيف الشّطيـر
واللي بغى علمي بعد يبطي جبالـي  راسيَـه

حكمة زمان الهمهمه والتمتمه سـادت كثيـر
دنياَ تقلّـب ياعـرب والفكـر غـادر راعيَـه

نفسي اقول السالفه وأنخى هلَ العرف الكبيـر
ماهي سوالف لاغيه ماهـي سوالـف لاغيَـه

نفسي أحصّل أجوبه للّغز من يومـي صغيـر
شبنا وشابت روسنا واللّغـز مانـي  ناسيَـه

ياحول أنا وين أبتغي للي فهم بعض  اليسيـر
خطو المراجل كسبها معـروف كانـه باغيَـه

أحدن هجع باله صفى وأحدن درج دمعه غزير
وأحدن فقد أمه وأبيه والدنيـا هـذي  فانيَـه

ماهي غريبه ياعرب دمعة تـرى أمّ  الأسيـر
ستّين عامن في حصار وحناّ نشوف  العافيََـه

طفلك يالأقصى بين عام والعام الآخر  مستدير
وأبيض كفن لفّه حدر قبـرن يناجـي باريََـه

الخام الأبيض مرتفع والذبح سهل  وفالجهيـر
وأكبر دليلي ياعرب ( الـدرّه ) شفنـا تاليََـه

مرحوم ياطفلن سكن تحت الثرى وقدره كبيـر
عطرك ترى عمّ الفضا وأمطر غيومن  جاليَـه

من وين ماجبنا القدم والسير واقف  مايسيـر
نصبح ونمسي فالضحى والفجر خيطه هاريَـه

فرّطنا فيها ياصلاح وأدري بأن قبـرك يغيـر
وشلون نبغى تنتصر..؟ القدس وأضحت خاليَه

من زمرتن عاثت فساد فالكـون يالله السّتيـر
أكّالة لحـوم البشـر وتهيـم فيهـا  ساليَـه

شارون يسرح مرتعن بين الخزامى  والغديـر
زنديق كافـر محتقـر للشّـر تابـع طاغيَـه

ومن دون ثالث قبلتن شفنا بعد شيخن كسيـر
يصيح وين المسلمين لبنـان طاحـت داميَـه

جاروا عليهم هاليهود يبون شبْعا فـي نفيـر
وحنا هنا جَمْعة بلـوت والكـل بالـه هانيََـه

القصف يدْوي فالمكان والقوم فينـا تستجيـر
لا حسّ أو حسّ انحصر فالقلب ماهو  خافيَـه

نفسي أصرّح ياعرب وأقـول لا لا  مايصيـر
لا لا ولا لا ياعـرب لبنـان ثانـي عـاريََـه

والثالثه باحت كنين يامحزمي وقـت العسيـر
بغداد…!..؟ بغداد العرب وأم بعباتـن باليَـه

والجوع من طيبه سكن فالبيت مع أهلَ  الفقير
يكسر فتاته من هموم والهـم لقمـه  عافيَـه

بيض العذارى تغتصب ماهو خفـا إلاّ جهيـر
والسالفه صارت سكوت واليا متـى ياعاديََـه

من كثر ماشفنا المصاب ماعاد فيها يا  ضمير
المجزره حول الدّجيل والقتـل عـاده جاريَـه

حلّ الدّمار وحَلْحَلَـهْ فالأمـن والدّيـره قفيـر
ماكنّها إلا بقعتـن صَبْخـا غـدتْ  متداميََـه

وأزرق سماها مظلمن كالليل مابه من عشيـر
واللّيل من بعد المغيب قصف المدافع ضاويَـه

أسوار بغداد وهوَت مثل الـذي نـوّخ  بعيـر
شامخ ولكن إنجبـر يرضـخ لواقـع  قاويََـه

أنهار جفّت والورود ذبْلَتْ قبل نَفْـحَ  العبيـر
والحنظل العلقم نِبَتْ وسْط البيـوت الخاويَـه

الحال واضح ياعرب والوضع جداً هو خطيـر
إلى متى نهوى السكوت والقلب ناره  صاليََـه

عزّي على القدس الكسير ولاّ على الحظ العثير
ولاّ على ذيك الديار لبنـان صـارت  غاديَـه

وعزّي لبغداد العرب سارت كما عكس  المسير
يارب تعْجـل بالفـرج وتعيـد مجـدٍ  بانيََـه




حمدان بن ربيع المطرفي العنزي